Staubwolgge


 

Home



Gschicht

Im Joor 1981 amme Grimpelturnier vom BD hän sich e baar
Fuessball Aagfrässeni zämme gfunde.
D'Mannschaft het dert dr Name Staubwolgge griegt.
(Das muess e scheene Acker gsi sii, dass es eso gstäubt het.)
Vo dääne Kollege hän sich drey zämme doo und hän zum Plausch fir dr Verein
aafo Schnitzelbängg singe.
Si hän denn immer me dr Plausch dra griegt und hän gfunde,
mir kennte doch au an dr Fasnacht Schnitzelbänggle.
Derno hän im 1983 dr Kläus, dr Eugen und Freddy dr Bangg "d Staubwolgge" grindet.
D'Staubwolgge duet mit iire Värs Staub uffwirble.
Si sin den offiziell bi dr "Basler Schnitzelbangg Gsellschaft BSG" byydrätte.
D'Värs hän si in dr Melodie "Ai du scheene Schnitzelbangg" gsunge und dr Freddy
het mit em glaine Örgeli dr Refrain uusequätscht. Alli drey hän gsunge.
Anno 1984 sin die drey s'erscht mol an dr Basler Fasnacht gloffe.
Si hän Goschtym, Helge und Värs alles in aigener Regie gmacht.
Dr Kläus isch e taläntierte Värspoet gsi, mit scharfe Pointe.
1990 het dr Kläus d'Staubwolgge verloo und e baar Jöörli druff isch äär denn vo uns gange, tringgt jetzt e Mass Bier mit em Aloisius und schriibt über de Wolgge Värs.

D'Staubwolgge het denn im 1990 pausiert.
1991 isch dr Hansruedi derzue koo und d'Staubwolgge het
e mänggi scheeni Fasnacht gnosse.
S'Elisabeth im Eugen sini Frau het denn d'Laitig vom Värsli brinzle ybernoo
und mit dääne drey Männer gmeinsam d'Värs gmacht. Jää d Staubwolgge isch dert scho fortschrittlig gsii und het e Frau ins Boot ghoolt.

Denn im Joor 1996 het dr Eugen au welle pausiere und d'Staubwolgge verloo.
In däm Joor isch dr André dr Sohn vom Freddy zur Staubwolgge derzue gschtoose.
Dr André het sini erschti Fasnacht im 1997 gnosse und isch vo dr BSG
fir dr Schlussoobe als Stv. vo dr Schlussoobe Obfrau uusgwählt worde.
Uus eme bizzeli hälfe (Technik und Regie) isch är denn im Joor 1998
als Schlussoobe Obmaa in Vorstand vo dr BSG gwäält worde.

Dr Hansruedi het sithär e versteggds Talänt entdeckt als Helgemooler.
Är duet si Talänt au an anderi wytergää und duet teilwyys fir ebe 4-5 Bängg d'Helge moole.
Im Joor 1999 hän mir d'Melodie g'änderet mit dr Unterstytzig vo dr Barbara Kleiner (s'Kurtli).
Es isch e wunderscheeni Melodie. 

Denn het dr Edi Seelig alias Saifiblooddere, speeter als Edeli, uns e anderi Melodie empfoole
und gholfe bim Värsli korrigiere.
Äär isch im André sii Mentor gsii und het en durch d Wält vom Schnitzelbänggle beglaitet.
Dr Eugen (ehemals Staubwolgge) isch denn als Helgeträger bim Edeli mitgloffe.
Au dr Edeli het iis verloo und wenn s als an dr Fasnacht drepfelet vom Himmel,
no waisch dr Edi isch am Värsli brinzle.

 Es sin wyteri sehr scheeni Fasnächt verby gange, bis sich dr André nach 8 Joor Vorstand in dr BSG
als Schlussoobe Obmaa zrugg zoge het.
Total 9 Schlussööbe im Casino, Volggshuus und de 3 Schiff. Mit viel Härzbluet und 2 Liveübertraagige im Telebasel (50 Joor Schorsch und 80 Joor BSG)

Dr Freddy het sich nach 20 aktive Bängglerjoor nach dr Fasnacht 2005 pensioniere loo.
D' Staubwolgge het dr Name bhalte um d'Tradition uffrächt z'erhalte,
was dr Freddy als letschts bi dr Staubwolgge aktivs Grindigsmitglied e tolli Sach findet.
Ainzig "d" isch ewäg gfalle und dr Bangg haisst jetzt "Staubwolgge".

Im Lauf vom 2005 isch d'Staubwolgge nach langem Entschaidigswääg vo dr BSG ewäg gange.
 D'Staubwolgge hed s'Glygg gha, dr Andy als neys Staubwolgge Mitglied uffznää,
äär und sii Handorgele sin dr entschaidende Faktor gsii, dass mir in d VSG gange sin.
Ney laufe mir an dr Fasnacht 2006 unter dr VSG (Verainigty Schnitzelbangg Gsellschaft).
 Är berychered d'Staubwolgge mit sine namhafte Erfaarige als Diefflieger Mitbegründer und sim Uffundzuekaib.
Mit ere neye Melodie und digge Värs dien mir s'erscht mol d'Fasnacht unter dr VSG erobere.
Dr Hansruedi hed an dääre Fasnacht 2006 20 Joor als Bänggler (derfoo 16 bi dr Staubwolgge)
 Dr Hansruedi het nach 20 Joor Fasnacht dr Rüggtritt bekannt gee.

Die Homepage do vo dr Staubwolgge isch s erscht mol uffgschalte worde im Jänner 2006.

Und im 2006 het dr André sii 10 Fasnacht als Bänggler gha.

 Nach dr Fasnacht 2010 isch dr Andy mit siner Handorgele nach 5 Fasnächt zruggdrädde.

D Fasnacht 2011 effnet e neys Kapitel vo dr Staubwolgge.
Neyi Mitglieder, neyi Larve und neys Goschtym.
Ney derby am Akkordeon dr Matthias und
am Helgestägge dr Michele genannt Keule.

 Im 2012 isch dr André und dr Matthias aane gsässe und hän e neyi Melodie greiiert.
Mit em Matthias sine musikalische Fäähigkaite isch das schnäll gange.
Dr André het e Melodie träumt und het sii vorgsummt, dernoo het dr Matthias d Note uffgschriibe, gformt mit Abschluss und d Melodie isch geboore.
 Mer hän e super mega giga Fasnacht gha und glyychzitig e Abgang bi dr VSG.


 Im Joor 2013 hän mir e neyi Perspektive bi de "Bängg fir Basel" gfunde.
 Dert sin mir rächt harzlig empfange worde und hän iis sofort wohlgfyylt.
S Bruucht mänggmol Veränderige zem wyterchoo.

Im 2014 ischs im Helgeträäger Michel gsundhaitligg nit so guet gange und het miese pausiere.
Es isch denn spontan d Cendrine yygsprunge und isch bis hyt no bi uns als Helgeträgerin und gueti Seel.
Eso erfyllt au d Staubwolgge si Frauequote.
Im 2015 hets denn e ganz e ney Goschtym gää.
E griene fräche Waggis mit em Staubwelggli uff dr Nase.

Im Herbscht 2016 het dr Thommy, s Amt als Obmaa vo de Bängg fir Basel abgää an dr André.
 Dr André vo dr Staubwolgge isch sithäär dr stolzi Obmaa vo de Bängg fir Basel.


E baar Zahle fir d Gschicht:


An dr Fasnacht 2020

isch d Staubwolgge 
 36 Joor  an dr Basler Fasnacht

und es sin

Sänger: André (Andi)  24. Joor am Bänggle 1997 - hyte
                      s
 04. Joor als Obmaa  2017 - hyte
Akkordeon:  Matthias 
10. Joor am Bänggle 2011 - hyte
Helgestägge:  Cendrine 
07. Joor am Bänggle 2014 - hyte
 


 

     Staubwolgge Ehremitglieder und Bangg Gryyndigsmitglieder
   und ehemaligi aggdivi :


    Freddy Voirol Gründig & aggdiv vo 1984 - 2005
(Sänger, Handörgeli, Värs, Helge und Schnyder) Ehremitglied
    Eugen Schudel Gründig & aggdiv vo 1984 - 1996
(Sänger und Värs)  Ehremitglied
    Kläus Decker  Gründig & aggdiv vo 1984 - 1990
(Sänger und Värspoet)  Ehremitglied
    Hansruedi Graf aggdiv vo 1991 - 2006 (Sänger und Helgekinschtler)  Ehremitglied
    Andy Schlup aggdiv vo 2006 - 2010 (Sänger, Handörgeler, Värs)
    Michele Populin aggdiv vo 2011 - 2013
(Helgeträäger)